МУГАЛИМДЕРДИН КЕСИПТИК МАЙРАМЫ

МУГАЛИМ – КЕСИПТЕРДИН УЛУУСУ
Мугалимдик иш – түйшүктүү иш, аны менен катар эле сыймыктуу иш! Анткени келечек муундарды окутуп, тарбиялап, турмуштун даңгыр жолуна багыт берип, адамдык сыпаттарды калыптандырып эрезеге жеткирген – бул Мугалим эмеспи.

Караңгыны жарык кылган шам чырак сыяктуу адамзаттын дүйнө таануусун калыптандырган, жаратмандык жана атуулдук бийик рух менен эмгектенип жаткан да Мугалим.

Бүгүн №1 Тоту Мойдунов атындагы Макмал жалпы билим берүүчү орто мектебинде билим берүү кызматкерлеринин кесиптик майрамына арналган салтанаттуу иш-чара болуп өттү. Ага районубуздун акими Манас Мураталиев, райондук билим берүү бөлүмүнүн башчысы Бактыбек Таалайбеков, айыл өкмөт башчылары, «Жамгыр» басма үйүнүн, «Калем» лидерлер академиясынын негиздөөчүсү, коомдук ишмер Мамбетасан Ибраев жана мугалимдер катышты. Райондогу алдыңкы мугалимдер сыйланышып жана майрамдык маанай тартуулоо үчүн биздин мектептин мугалимдер жамааты концерт тартуулашты. Мугалимдердин майрамында 2 мугалимге Египетке жолдомо берилди, алар биздин мектептин мыкты мугалимдери Бекташова Жанара жана Аманова Канышай.

Тогуз-Торо райондук мамлекеттик администрация башчысы -аким Манас Мураталиев: 2023-2024-окуу жылында Билим берүү жана илим министрлиги уюштурган сынакта Тоту Мойдунов атындагы №1 Макмал жалпы билим берүүчү орто мектеби “Жылдын мыкты мектеби” аталгандыгы үчүн 30 000 сом сертификат тапшырды.